Ra’iisal Wasaaraha Soomaaliya oo la
kulmay Ergayga EU-da u qaabilsan arimaha geeska Afrika.
(Muqdisho,
April 19, 2012 Ceegaag Online)
Ra’iisul Wasaaraha
Dowladda KMG ah Soomaaliya Dr. C/weli Maxamed Cali (Gaas)
ayaa maanta xafiiskiisa ku qaabilay Ergeyga gaarka ah ee
ururka Midowga Yurub u qaabilsan arrimaha Geeska Afrika Mr
Alexander Rondes iyaga oo ka wadahadlay horumarinta xiriirka
Dowladda Soomaaliya iyo ururka Midowga Yurub oo kaalin weyn
ka qaata taageerada Dowladda KMG ah.
Shir jaraa’id oo ay si
wadajir ah ugu qabteen Xafiiska Ra'iisal wasaaraha ayaa
waxaa ugu horeyn warbaahinta la hadlay Ra’iisul Wasaare C/weli
Gaas isaga oo xusay in Mr.Rondes ay ka wadahadleen sidii loo
horumarin lahaa xiriirka ka dhaxeeya Dowladda iyo Midowga
Yurub, isaga oo ku ammaanay inay qeybta ugu weyn ka qaataan
sidii loo meel madhinlahaa qorshaha Tubta Nabadda (Roadmap),
taasoo ah howsha ugu weyn ee hortaala Dowladda Federaalka
KMG ah ee Soomaaliyeed xilligan kala guurka.
“Midowga Yurub waxaan ka
wada hadalney dardar gelinta hanaanka hadda socda ee
Roadmap-ka, dhameystirka dastuurka, soo xulidda baarlamaanka
Soomaaliya iyo dowladda la filayo August oo ay Soomaali u
mideysan tahay oo aan noqoneyn isku aragti eyna taageero
ballaaran ee ay u fidiyaan Dowladda iyo shacabka
Soomaaliyeed, waana taageeraha ugu weyn ee gacanta ka geysta
sidii loo dhaqangelin lahaa Qorshe howleedka dowladda ee
Roadmap” ayuu yidhi Ra’iisul Wasaare Gaas.
Sidoo kale waxaa isna
warbaahinta la hadlay Mr. Alexander Rondes oo guul ku
tilmaamay inuusan aheyn markii ugu horeysan uu yimaado Madaxtooyada
Villa Somalia ee magaalada Muqdisho uuna wadahadalo midho
dhal ah la qaato madaxda dowladda oo uu ugu horeeya Ra’iisal
Wasaare Dr. C/weli isaga oo hoosta ka xariiqay in waxyaabo
badan oo ay ka wadahadleen ay si wanaagsan isula meel
dhigeen.
“Waxaan marka hore u
mahadcelinayaa Ra’iisul Wasaaraha Soomaaliya Pro.Gaas iyo
soo dhaweynta na loo sameeyay, Sidoo kale Wuxuu sheegay in
wadahadala ay la qaateen ra’iisul Wasaaraha uu ula noqon
doono Midowga Yurub si loogu sharaxo wadamada ku jira
midowga Yurub". ayuu yidhi Mr Alexander Rondes
Si kastaba ha ahaatee
Mr Rondes ayaa ku
amaanay isbadeleda hormarka leh oo ay sameysay dowladda KMG
ah gaar ahaan Magaalada Muqdisho, Sidoo kale wuxuu ugu
danbeyntii u mahadceliyay saxaafada, isagoo ku amaaney sida
ay u tabiyaan wararka ku saleysan xaqiiqda.
