Madaxweyne
Shariif oo booqdey goobtii shalay qaraxu ka
dhacay.
(Muqdisho, April 05, 2012 Ceegaag Online)
Madaxweynaha
Dowladda Federaalka Soomaaliya Shariif Sheekh
Axmed ayaa Maanta booqasho ku tagay xarunta
golaha murtida iyo madadaalada Qaranka
Soomaaliyeed oo ay shalay uu ka dhacay qarax ay
isku qarxisay haweeney ay marin habaabiyeen kooxda
Al- shabaabka ee ururka Al-qaacidada.
Madaxweyne
Shariif oo ay wehliyeen saraakiisha sar sare ee
ciidamada xoogga dalka, booliska iyo hay’adda
nabadsugidda ayaa wacad ku maray in maxkamada
lasoo taagidoono dadkii ka dambeeyay qaraxii
shalay ka dhacay xarunta golaha murtida iyo
madadaalada ee magaalada Muqdisho.
Madaxweynaha
Soomaaliya oo saxaafadda kula hadlay gudaha
tiyaatarka ayaa sheegay in dowladda Soomaaliya ay
guddi u saartay baarista qaabkii uu qaraxii shalay
u dhacay waxa uuna ballan qaaday in ciidii ay ku
cadaato in ay fududeysay qaraxii shalay sharciga
lasoo taagi doono, isagoo dhanka kalena hoosta ka
xariiqay in dadka xaaladdooda wax looga qaban
waayay dalka gudihiisa ay dowladdu ka shaqeyneyso
sidii ay dadkaasi ugu heli lahayd daryeel
caafimaad oo dibada ah.
Xarunta
tiyaatarka Qaranka Soomaaliyeed ayaa waxaa shalay
aheyd isku qarxisay haweeney isku sooxirtay
waxyaabaha qarxa xilli ay ka socotay munaasabad
ballaaran oo loogu dabaaldegayay sanad guuradii 28
aad ee ka soo wareegtay Aasaaska TV-ga qaranka
Soomaaliyeed.
