Dallad ay ku mideysan yihiin ururrada ka
shaqeeya samofalka iyo horumarinta bulshada
ayaa maanta looga dhawaaqay Muqdisho,
waxaana munaasabadda looga dhawaaqay
goobjoog ka ahaa xubno ka socday qaar ka mid
ah hay'adaha gargaarka caalamka. Dalladdan
oo loogu magacdaray Somali Huminaterian
Opretional Consortium (SHOC) ayaa waxaa ku
mideysan 43 hay'adood oo maxalli ah,
iyadoo xafladda ay hadallo ka jeediyeen
mas'uuliyiinta kala duwan.
Guddoomiyaha daladda SHOC, C/qaadir
Abuubakar Sheekh (Weha) oo ugu horreyn hadal
ka jeediyay munaasabadda ayaa sheegay in
dalladdan la sameeyay bishii September 2011,
ayaa wuxuu sheegay in maanta lagu dhawaaqay,
isagoo xusay in ujeedooyinka loo aasaasay ay
ka mid yihiin sidii shacabka Soomaaliyeed
loogu caawin lahaa gacmo wadajir ah.
"Sababta loo aasaasay SHOC waa inay kala
shaqeyso hay'adaha caalamiga ah iyo sidii
lagu caawin lahaa dadka dhibaateysan," ayuu
yiri C/qaadir Weha. "Sidoo kale waxaa ka mid
ah ujeedooyinka sidii loo dhiirigelin lahaa
in dadku isku kalsoonaadaan waxna qabsadaan."
Xubnihii ka hadlay munaasabadda waxaa ka mid
ahayd, Sahro Cali Xasan oo ah la taliyaha
daladda SHOC iyadoo ku hadlaysay magaca
saddex hay'adood oo ka mid ah kuwa taageera
SHOC oo kala ah: MCT, SRDF iyo THF ayay
sheegtay inay ku faraxsan tahay inay
dalladdu ay halkan soo gaarto.
Madaxa hay'adda Qatar Charity, Durraan Axmed
Faarax oo munaasabadda ka hadlay ayaa isna
wuxuu sheegay in ururrada samofalka ay ku
midoobaan daladdan ay suurogelinayso in si
fudud wax lagu gaarsiiyo bulshada
Soomaaliyeed. Sidoo kale, waxaa goobta ka
hadlay Dr. Axmed Aadan madaxa ururka
iskaashiga Islaamka xafiiskiisa Soomaaliya
oo u dhashay Suudaan ayaa xusay inuu aad ugu
faraxsan yahay soona dhaweynayo SHOC oo uu
sheegay inuu goobjoog ka ahaa aasaaskeeda.
"Waxaan ku faraxsanahay in howsha SHOC ay
halkan soo gaarto, maadaama aan goobjoog ka
ahaa aasaaskeeda. Waxaana ballanqaadayaa
inaan taageero hiil iyo hooba ah la garab
istaagayno dalladda," ayuu yiri Dr Axmed
Aadan. Isagoo xusay inuu rajeynayo inay wax
weyn ka qabato howlaha samofal ee Soomaaliya.
Dhammaan mas'uuliyiintii ka hadlay
munaasadda ku dhawaaqista daladda SHOC ayaa
waxay soo dhaweeyeen hindisahan cusub ee
lagu caawinayo shacabka Soomaaliyeed, iyadoo
la filayo in daladdan ay hormuud u noqon
doonto sidii la isku kaashan lahaa.
Ugu dambeyn, waxaa baaq diray guddoomiyaha daladda SHOC, C/qaadir Weha
isagoo hay'adaha caalamiga ah ku
dhiirrigeliyay inay dalladda kala shaqeeyaan
sidii shacabka Soomaaliyeed loogu caawin
lahaa wadajir.
