|
Ciidamada
Itoobiya oo bilaabey in hogaamiye kooxeedyadii hore ee
Muqdisho dib hubkooda ugu celiyaan.
(Muqdisho, July
11,
2008 Ceegaag Online)
Dowlada Itoobiya ayaa go'aansatey in hogaamiye kooxeedyadii
hore ee Muqdisho dib loogu celiyo hubkii laga qaadey
islamarkaana awoodooda dib loo soo nooleeyo, Muuse Suudi
Yalaxow ayaa lagu soo celiyey xaruntiisi hore ee degmada
Kaaraan waxaana gebi ahaan loo celiyey hubkii hore looga
qaadey, waxaana sidoo kale hubkiisii la siiyey Maxamed
Dheere oo iminka ah duqa magaalada Muqdisho iyo gudoomiyaha
gobalka Banaadir, sidoo kale waxaa maalmaha soo socda
magaalada Muqdisho ku soo foodleh Maxamed Qanyare Afrax
waxaana loo balanqaadey in hubkiisii dib loogu celin doono.
Warar si hoose nagu soo gaarey ayaa sheegaya in Cabdi
Qaybdiid isna lagu wareejin doono hub dowlada Itoobiya ka
qaadey guriga Cismaan Caato mudo hadda laga joogo hal sano.
Lama oga Ujeedada ka dambeysa in dib loo howlgeliyo
hogaamiye kooxeedyadii Muqdisho oo ka sii baxayey masraxa
siyaasada Soomaalida laakiin dad xog-ogaal ah oo inoo
waramey ayaa sheegaya in dowlada Itoobiya dareentey in ay ku
fashilantey dullaankeedii iyo danihii ay ka lahayd
Soomaaliya sidaa darteed dooneyso iminka inta aysan ka bixin
ciidamadooda Soomaaliya in ay Muqdisho ka dhigto sidii ahaan
jirtey ka hor xiligii maxaakiimta, magaalo ay ka taliyaan
hogaamiye kooxeedyo u taagan foodo iyo dagaal si
marnaba u suurtagelin in caasimada Soomaaliya xasisho.
Nin
Sarkaal ah oo arintan ka wareysaney ayaa isna qaba aragti
taas ka duwan oo wuxuu inoo sheegey in ay jirto qorshe kale
oo dowlada Mareykanka iyo Itoobiya ay isla ogyihiin oo ah in
dib loo soo nooleyo Isbahaysigii Argagixo la Dirirka dibna
loo howgeliyo iyaga oo dowlada federaalka ka madaxbanaan,
dhinacoodana kala dagaalamaan Al Shabaab iyo in ay soo qab
qabtaan rag ganacsato iyo culumo isugu jira oo lagu
eedeynayo in ay taageeran Muqaawamada.
Qorshahan cusub ayaa la sheegayaa in madaxweyne C/llahi
Yuusuf ku faraxsaneyn wuxuuna u arkaa qorshe lagu sii
wiiqayo nidaamkii dowladnimo uu ku taamayey. Waxaa sidoo
kale qorshahan cusub ee Itoobiyaanka hubka ku celinayaan ka
xun Ra’iisal Wasaare Nuur Xasan Xuseen (Nuur Cadde) oo
arintan u arka mid lagu burburinayo howlihii dib u
heshiisiinta ee uu maalmahan ku howlanaa
www.ceegaag.com
webmaster@ceegaag.com |
