Kooxda Al-shabaab oo sheegatay weerarkii iyo duqeyntii xalay lagu qaaday qeybo ka mid ah magaalada Baydhabo.

(Baydhabo, July 08,  2008 Ceegaag Online)

Afhayeenka Ururka hubeysan ee Al-shabaab Sheekh Mukhtaar Roobow Abu Mansuur oo qadka taleefoonka shir jaraa’id ugu qabtay warbaahinta ayaa qirtay in xoogagooda ay ka dambeeyeen duqeyntii iyo weerarkii xalay lagu qaaday qeybo ka mid ah magaalada Baydhabo ee xarunta gobolka Bay.

Sheekh Mukhtaar Roobow wuxuu sheegay in xoogagga Al-shabaab ay xalay la wareegeen gacan ku haynta qeybo ka mid ah magaalada Baydhabo oo ay ka cayriyeen ciidamada cadowga iyo kuwa daba dhilifka u ah ee halkaasi ku sugnaa, sida uu hadalka u dhigay, wuxuuna intaa ku daray, in ay duqeeyeen garoonka diyaaradaha ee magaalada Baydhabo iyo madaxtooyada oo ay ku sugnaayeen wax uu ku tilmaamay cadowga Ilaahay.

Afhayeenka Ururka Al-shabaab Abuu Mansuur wuxuu sheegay in aanay dhankooda wax heshiis xabbad joojin ah la geli doonin ciidamada Itoobiya iyo Dowladda federaalka  toona tan iyo inta ay ciidamada cadowga ku sugan yihiin ciidda Soomaaliya, madaxda hogaaminaysana dawladdana ay dawladnimo sheeganayaan, wuxuuna intaa ku daray in dagaalka ka dhanka ah cadowga Ilaahay iyo Murtadiinta ay sii wadi doonaan ilaa ay dalka Soomaaliya ka xoreeyaan.

“Magaalada Baydhabo waa magaalada aad ku sheegayseen inay ammaan idiin tahay oo aad gacanta ku haysaan, waana Ilaahay Mahaddiis mar haddii Mujaahidiinta ay qeyb ka mid ah magaaladaasi gacanta ku hayaan” ayuu yiri Sheekh Mukhtaar Roobow Abu Mansuur oo dhinaca kale sheegay in xabaddoodu ay ku wajahan tahay oo kaliya Cadowga Ilaahay iyo kuwa Murtatiinta ee iyaga daba orda.  

www.ceegaag.com

webmaster@ceegaag.com