Kooxihii burcad badeeda ahaa ee afduubka ku heystay Markab Jarmalka laga lahaa oo ay sii daayeen markii Madax Furasho lasiiyay.

(Somalia, July 09,  2008 Ceegaag Online)

Kooxihii burcad badeedda ahaa ee muddooyinkii ugu dambeeyay afduubka u haystay markab ka diiwaan gashanaa dalka Jarmalka ayaa shalay gelinkii dambe fasaxay markabkaasi kaddib markii sida la sheegay ay qaateen lacago madax furasho ah oo aan cadadeeda la shaacinin.

Markabkan oo lagu magacaabo Lehman Timber kana diiwan gashanaa dalka Jarmalka ayay kooxo burcad Soomaali ah ka qafaasheen xeebaha Gacanka Cadmeed 28-kii bishii May ee la soo dhaafay, waxaana markabkaasi saarnaa kabtanka oo u dhashay dalka Ruushka, afar ka mid ah shaqaalaha oo u dhashay dalka Ukraine.

Kooxaha afduubka ku haystay markabkan ayaa waxay qabsadeen waqti kama dambeys ah oo ku beegnayd 7-da Luulyo oo shalay ku beegneyd iyagoo ku hanjabay in haddii waqtigaasi ka hor madax furasho la siin waayo ay gebi ahaanba dili doonaan shaqaalaha markabkaasi, iyagoo xabbado kor marsiyay shaqaalaha si ay u cabsi geliyaan, sida uu xaqiijiyay kabtanka markabkaasi oo eheladiisa la xiriiray kaddib markii la sii daayay. 

Lama shaacinin inta ay la eg tahay lacagta madax furashada ah oo ay qaateen burcad badeeddaasi inkastoo ay horay u dalbadeen lacag gaaraysa 750,000  oo Dollar, balse kabtanka markabka ayaa xaqiijiyay in kooxahaasi burcad badeedda ah tirsadeen lacag fara badan oo boqollaal kun gaaraysay.

www.ceegaag.com

webmaster@ceegaag.com