Maamulka Puntland oo jawaab ka bixisay baaqii Isimada ee ku aadanaa dhaliisha Xukuumadda.

(Garoowe, July 02,  2008 Ceegaag Online)

Warsaxaafadeed ka soo baxay Xafiiska Wasaaradda Warfaafinta ee Maamulka Puntland ayaa lagu sheegay in qoraalkii ay soo saareen Qaar ka mid ah  Isimada Puntland aysan Dowladda la socon isla markaana aysan jirin go'aano ugu yimid Isimada Puntland, wuxuuna Warsaxaafadeedka u qornaa sidan:.

WAR MURTIYEED

Maalintii Isniinta 30-kii bishii Juun 2008, waxaa warbaahinta lagu baahiyay qoraal ku saabsan go'aano ka soo baxay shir la sheegay in uu Garoowe ka dhacay oo ay soo saareen qaar ka mid ah Isimada Puntland.

Qoraalku wuxuu xambaarsanaa dhaliilo, tilmaamo iyo talooyin loo jeediyay gobolada iyo dadweynaha reer Puntland, iyadoo aan hore loo ogsooneyn shir Garoowe Isimada ugu socday.

Xukuumadda Dowlad Goboleedka Puntland waxay xurmo iyo qadarin weyn u heysaa hoggaanka dhaqanka guud ahaan, gaar ahaanna Isimada Xidhiidhka Dowladda iyo Isimada wuxuu had iyo jeer ahaa joogto ay kaga wada tashadaan xaadalaha dalka soo wajaha.

Hadaba Maamul Goboleedka Puntland waxay halkan ku cadeyneysaa:

1. In aaney jirin go'aan ugu yimid Isimada Puntland

2. Waxaa Dastuurka dalka u yaal dhinac marsan in gobolada lagu khaldo isugu yeeris ergooyin uusan dalbin maamulka.

3. DGPL waxaa u degsan sharci iyo nidaam dowladeed oo kala qeexan, mana ogolaan doonto falal loo fasiran karo in lagu burburiyo jiritaankeeda oo howlo iyo marxalado badan ummadu u soo mareen.

4. Ciddii ay ka dhab tahay doonis is-badal maamul waxaa ay tixgelinta shacabka ku kasban karaan marka ay xeeriyaan sharciga iyo nidaamka waqtiga doorashada, isla markaana ayan horseedin cadaawad wax dumis ah xilliyadaan arrimaha Soomaaliya ay cakiran yihiin.

C/raxmaan Maxamed Saalax
Wasiirka Warfaafinta Maamul Goboleedka Puntland

Garoowe, Somalia

www.ceegaag.com

webmaster@ceegaag.com