Shirkii Isbaheysiga Labada garab ee Asmara oo Maanta ka furmay Magaalada Sana’a ee Dalka Yemen.

(Sana'a, July 06,  2008 Ceegaag Online)

Shirkii lagu dhexdhexaadinayey madaxda sare ee Isbaheysiga Asmara ee dhawaanahan la filayey inuu ka furmo magaalada Sanca ee dalka Yemen ayaa saaka si habsami leh uga furmay Hotel Istanbul ee magaaladan Sanca

Shirka oo la doonayo in lagu dhameeyo khilaafka soo kala dhax galay Isbaheysiga ee ku wajahan sidii loo maamulay heshiiskii Jabuuti ay ku gaareen Dowlada Federaalka iyo Mucaaradkeeda iyadoo ay jireen in Garabka Xasan Daahir Aweys ay ka biyo diideen heshiiskaasi.

Waxaa maanta la iska dhex doortay gudi ka kooban 9 xubnood kaasi oo wadi doona howsha shirka una kala dabqaadi doona labada dhinac ee shirka lagu dhex dhexaadinayo oo ka wada tirsan madaxdii Maxaakimta Islaamiga ah iyo Xildhibaano laga saaray Barlamaanka Dowladda Federaalka kadib markii ay ku xadgudben dastuurka Dalka.

Gudigan oo hada ku jira shir albaabada ay u xiran yihiin ayaa waxaa gudoomiye u ah Prof. Ibraahiim Cadoow oo ah nin si weyn looga dhex yaqaan golaha Isbaheysiga iyo kii Maxkamadahaba iyadoo la filayo in saacadaha soo socda la guda galo ama la soo bandhigo Ajandayaashii laga wada hadli lahaa.

Goobta uu shirka ka socdo ayaa waxaa ku soo qulqulaya wafuud fara badan oo ay ku jiraan rag aqoon yahano Soomaaliyeed ah kuwaasi oo iskood isku xilqaamay diyaarna u ah iney labada dhinac isku soo jiidaan hadii ay dhacdo in qodobada qaar la isku mari waayo.

Isbaheysiga Asmara Garabka Labada Shariif ee sexiixday heshiiskkii magaalada Jabuuti Bishii June 9-keeda ayaa waxaa horboodaya Sheekh Shariif Sheekh Axmed iyadoo garabka xasan daahir Aweys ee fadhigeedu yahay Magaalada Asmara ee dalka Eritrea uu wakiil u yahay Sheekh Cumar Iimaan oo shalay soo gaaray Magaalada Sanca ee Dalka Yemen.

www.ceegaag.com

webmaster@ceegaag.com