Waa sidee Xaalada Cisbitaalada Magaalada Baydhabo oo Xarun u ah Barlamaanka Somalia?

(Baydhabo, July 24,  2008 Ceegaag Online)

18-sano ka hor Cisbitaalka Magaalada Baydhabo waxaa uu ahaa mid ka mid ah Cisbitaalada ugu wanaagsan Soomaaliya waxaa uu lahaa qeybo badan oo Bukaanada lagu kala maareeyo, waqtigaas oo uu Magaalada Barasaab ka ahaa Mas’uul kasoo jeeda Goboladda SSC haatanse Cisbitaalka ma laha hal qeyb oo kaliya oo la isku halayn karo, waayo,waxaa ka muuqata Cisbitaalka burbur iyo daryeel la'aan, taas oo ay u wacan tahay wax tar la'aanta Hay'adaha Qaramada Midoobay.

Dhibaatada jirta ayaa waxay tahay, Sariiraha Cisbitaalka oo liita, Daawo la'aan, Dhaqaatiir la;'aan iyo dhismaha Cisbitaalka oo aad moodo inuu yahay xero ciidan, maba rumeysan kartid in dhismahaas uu yahay Cisbitaal ama goob Caafimaad.

Qiyaastii Bulshada ku dhaqan Gobolka Bay ayaa la sheegaya inay ku dhaw yihiin tiro ahaan 2 Million maadama Magaalada iyo Degmooyinkeeda ay buux dhaafiyeen dad ka barakacay Magaalada Caasimadda ah ee Muqdisho sidaas darteed waxay dadkaas halis ugu jiraan inay u dhintaan xanuun kasta oo soo wajaha maadama aysan heli Karin goob Caafimaad ama daryeel Caafimaad.

Waa ay adag tahay in ruux qaba dhaawac halis ah 5 daqiiqo oo kaliya lagu gaarsiiyo Isbitaalka Magaalada Baydhabo oo Magaalada u jira in ka yar 2 KM marka aad eegto halka uu Isbitaalka ku yaala iyo Bartamaha Baydhabo, maxay tahay sababta dhibaatadaas dhalisay, waxaa taasi u wacan wadada isku xirta Isbitaalka iyo Magaalada oo Raf ah.

2-sano ayaa laga jooga Markii Magaalada Baydhabo Baarlamaanka iyo Xukuumadda Soomaaliya ay fadhiisin ka dhigteen waqtigaas ilaa iyo xilligan la jooga ma jirto wax muuqda oo Dowladda Federaalka Soomaaliya ka qabatay Cisbitaalka weyn ee Magaalada Baydhabo.

www.ceegaag.com
                                                                                   

webmaster@ceegaag.com